N comentar dl caporedadù dla Usc di Ladins, Iaco Rigo
Conchita Wurst
Spetacul tl spetacul che sfola le spetacul. A cösc ultim Eurovision Song Contest à n ël vistì sö da ëra trat l’atenziun danter Portugal y Aserbaigian, y danter Islanda y Ziper, y à davagné. So inom Conchita Wurst, n inom d’ert. Tl ofize anagrafich de Gmunden tl’Austria à Conchita Wurst inom Tom Neuwirth; Tom é chersciü sö tla Steiermark. Sides Conchita co Tom é atrać da ëi y nia da ëres, te chësc ési medemi. Tom s’à inventè n “alter ego” por la sozieté y le spetacul, s’à spo trasformè te Conchita, se vistin da ëra, lascian la berba de so dër corp. Por deventè Conchita ne se operëiel nia, demez o laprò, val’. Al adora chës döes ores por gnì Conchita. Y sü stüdi da designer de moda le dëida te süa performance dan al publich y te süa trasformaziun da ël a ëra. Spetacul é spetacul y resta spetacul. Canche Conchita Wurst davagna spo le Eurovision Song Contest pઠdöta la musiga, döta na esibiziun desco n contest y ćinamai na vita n spetacul – almanco por chëres y chi che n’à nia le debujëgn da messëi se vistì tl ater ses por ester se instësc. Por i atri él gnü le dër momënt y na ocajiun straordinara da se identifiché n iade cun na porsona che à´ ma val’: podëi ester finalmënter ëra instëssa, zënza che ara vëgnes preiudicada y descriminada. Conchita Wurst é gnü n idol, deache te chësc idol se respidlëia le spetacul cun la vita plü co mai denant.
Scrì na resposta