{"id":100590,"date":"2026-08-02T18:46:25","date_gmt":"2026-08-02T16:46:25","guid":{"rendered":"https:\/\/www.brennerbasisdemokratie.eu\/?p=100590"},"modified":"2026-08-13T09:47:20","modified_gmt":"2026-08-13T07:47:20","slug":"la-jent-basca-a-cumbatu-y-cumbat-mo-for-per-la-ndependenza","status":"publish","type":"post","link":"https:\/\/www.brennerbasisdemokratie.eu\/?p=100590","title":{"rendered":"La j\u00ebnt basca \u00e0 cumbat\u00f9 y cumbat mo for per la ndepend\u00ebnza."},"content":{"rendered":"
<\/div>

de Sofia Stuflesser<\/em><\/p>\n

Storia \u2013 dala unit\u00e0 ala spartizion<\/h6>\n

Tl medieve fova na gran pert dla Euskal Herria adum sota l ducat de Vasconia. Tl 9. secul se \u00e0 i bascs dl sud destac\u00e0 y \u00e0 met\u00f9 su l reiam de Pamplona, ntan che tl nord ie rest\u00e0 l ducat de Vasconia. Ch\u00ebsta situazion ie resteda nscila nchin tl 16ejim secul. Dal 12ejim secul inant \u00e0 i spanuei t\u00ebut ite l Paesc Basch dl sud. Sceb\u00ebn che i fova sota i spanuei \u00e0 i bascs manten\u00ec si leges y si autonomia politica nchin al 1876. Feter l medemo iel suzed\u00f9 tl nord. Tl 17ejim secul \u00e0 i franz\u00ebusc t\u00ebut ite l ducat de Vasconia. Il\u00f3 ai pud\u00f9 manten\u00ec si leges y autonomia nchin ala revoluzion franz\u00ebusa dl 1789.<\/p>\n

Mpurtant per la storia di bascs dl sud ie la viera dla Sezescion. R\u00eb Ferdinand VIII. ova na muta de 13 ani, Isabella, che dassova pona devent\u00e9 regina. Si berba y fra dl r\u00eb Ferdinand, che ova inuem Carlo, ulova ruv\u00e9 sun l tron. L ie stat na viera, pra ch\u00ebla che i bascs fova pra la pert de Carlo, che ti ova mpermet\u00f9 de manten\u00ec la regules basches (a ch\u00ebles che i spanuei ti dij \u201cprivilegs\u201d, ma vester iel si regules). Danz che Carlo ova perd\u00f9. Nscila ie Isabella deventeda regina. Dla regules basches ala m\u00e9 lasci\u00e0 pro ch\u00ebla che i possa t\u00f2 ite y part\u00ec ora la ch\u00ebutes tla Euskal Herria. Perch\u00ebl v\u00ebn la ch\u00ebutes for mo t\u00ebutes ite y partides ora tla region. I catalans p. ej. ne \u00e0 nia ch\u00ebsc d\u00ebrt, y perch\u00ebl ai na gran nvidia permez ai bascs, dijan: \u201cVo \u00ebis pu bele dut!\u201d Ma nce sce i bascs \u00e0 ch\u00ebsc d\u00ebrt, iel mo truepa ngiustizies contra ch\u00ebles che la va de se par\u00e9.<\/p>\n

Na regula che la regina Isabella \u00e0 met\u00f9 su ie nce ch\u00ebla che i bascs messova j\u00ec tla viera per i spanuei, che ne fova nchina ntl\u00ebuta mo nia. Nscila ai mess\u00f9 j\u00ec tla viera dla ndepend\u00ebnza de Cuba, ulache l n ie mort n grumon, sceb\u00ebn che l ne fova gor de no te si nteres de j\u00ec a cumbater per i spanuei y contra i cubans. Truep bascs simpatisova cun i cubans, davia che i se udova nst\u00ebsc coche prima colonia dla Spania. Mo al didancuei iel truepa cianties che trata de ch\u00ebsta desgrazia.<\/p>\n

Viera zevila, ditatura y terorism<\/h6>\n

Ntan la viera zevila spanuela (1936-1939) \u00e0 i bascs giap\u00e0 dal guviern zentrel la cumpet\u00ebnzes de se autoguvern\u00e9. Danz che ch\u00ebsta autonomia ie fineda via tl 1937, canche i pucis\u0107 de estrema man dr\u00ebta \u00e0 t\u00ebut ite l Paesc Basch sota l general Francisco Franco. L ditat\u00ebur aministrova l Paesc Basch in\u00f2 te na maniera zentrela, \u00e0 pruib\u00ec l basch y \u00e0 perseguit\u00e0 y maz\u00e0 chi che se metova de contra. La ditatura \u00e0 dur\u00e0 nchin ala mort de Francisco Franco, tl 1975.<\/p>\n

Coche reazion ala ditatura iel nasci\u00f9 tl 1958 la urganisazion tlandestina Euskadi Ta Askatasuna (Paesc Basch y lid\u00ebza \u2013 ETA) che ova l travert de fin\u00e9 via la ditatura y arjonjer la ndepend\u00ebnza.<\/p>\n

Per arjonjer ch\u00ebsc fin \u00e0 la ETA gauj\u00e0 truep atentac y maz\u00e0 plu de 800 persones. I prims ani mazovi te na maniera seletiva, dantaldut cum\u00ebmbri spezifics dla forzes armedes spanueles, ma man man iesi deventei for manco y manco seletives, slargian ora l c\u00ebrtl de vitimes y j\u00ebnt malterjeda a pulitiganc, jurnalis\u0107, mprendit\u00ebures y nsci inant. Daujin ai atentac \u00e0 l ETA nce fat rapim\u00ebnc, estorscions, manacedes y n.i.<\/p>\n

La viul\u00ebnza fova samb\u00ebn de tramedoi viersc. La sotmiscion di spanuei contra l ETA fova suv\u00ebnz na represcion contra duc i muvim\u00ebnc bascs per la ndepend\u00ebnza. Dal 1959 nchin al 2015 iel un\u00ec document\u00e0 passa 6.000 caji de tortura de zitadins bascs. L guviern democratich spanuel \u00e0 stlut media bascs coche stazions dal radio, zaites y nsci inant, \u015baran via pulitiganc, mprendit\u00ebures, maestri, jurnalis\u0107 y nsci inant che fova per la ndepend\u00ebnza. Tl 2008 fovel mo passa 700 cum\u00ebmbri dl\u2019ETA te perjon. Al didancuei nen iel mo passa c\u00ebnt.<\/p>\n

Perm\u00f2 tl 2018 \u00e0 l\u2019\u00e0 l ETA data su, ne arjunjan degun di fins che i se ova t\u00ebut dant: no la reunificazion no la ndepend\u00ebnza, no amnestia per si perjunieres.<\/p>\n

\"\"<\/p><\/blockquote>\n

Cherta cun la azions dla ETA tl Paesc Basch dal 1961 al 2010.1<\/a><\/sup>https:\/\/www.bpb.de\/themen\/kriege-konflikte\/dossier-kriege-konflikte\/54582\/baskenland\/<\/span><\/small><\/em><\/p>\n

Uel pa la j\u00ebnt basca mo la ndepend\u00ebnza?<\/h6>\n

L falim\u00ebnt dl ETA \u00e0 ab\u00f9 na fazion negativa sun l muvim\u00ebnt basch per la ndepend\u00ebnza. Nce l falim\u00ebnt dl muvim\u00ebnt de ndepend\u00ebnza catalan ie stat na dejilujion per i bascs. Partic naziunalis\u0107 bascs ne \u00e0 nia la ndepend\u00ebnza coche travert. Mpo iel truep muvim\u00ebnc de zitadins che se mp\u00ebnia per la suverenit\u00e0. Al didancuei se mbinc\u00ebssa mo nt\u00ebur al 20-30% dla populazion la ndepend\u00ebnza.<\/p>\n

Per la ndepend\u00ebnza iel argum\u00ebnc basei sun l\u2019identit\u00e0 y argum\u00ebnc soziei. La ndepend\u00ebnza ferm\u00ebssa su l\u2019assimilazion spanuela y franz\u00ebusa dl Paesc Basch. Z\u00ebnza ch\u00ebsta gran nflu\u00ebnza dala Spania y dala Franzia pud\u00ebssa la rujeneda, la cultura y l\u2019identit\u00e0 coletiva s\u00eburaviver plu saur\u00ec. Pra i argum\u00ebnc soziei iel da d\u00ec che la ndepend\u00ebnza miur\u00ebssa la vita di zitadins bascs, sibe per cie che reverda l\u2019economia che la giustizia soziela: l Paesc Basch ie plu prugressif che la soziet\u00e0 spanuela y \u00e0 plu ressurses economiches che la Spania.<\/p>\n

Truepa j\u00ebnt basca se d\u00e0 da f\u00e9 per la ndepend\u00ebnza. L\u2019\u00ebila che me \u00e0 dat d\u2019albierch, Begotxu, ie pra n muvim\u00ebnt che \u00e0 inuem Naziogintza<\/a> che se \u00e0 t\u00ebut dant de arjonjer la suverenit\u00e0 dl Paesc Basch, ma n pesc. I scrij articuli, urganisea manifestazions y cunfer\u00ebnzes y mo truep depl\u00f9. L muvim\u00ebnt sust\u00ebn nce prutestes urganisedes da d\u2019autra grupes.<\/p>\n

Danz che la ndepend\u00ebnza semea mo dalonc. Ntant muessen pa m\u00e9 se cuntent\u00e9 cun l\u2019autonomia. La Cumunit\u00e0 Autonoma Basca y la region de Navarra \u00e0 na si autonomia. La pert basca tla Franzia ne \u00e0 al incontra deguna autonomia y donca nce manco scunanza.<\/p>\n

La j\u00ebnt se \u00e0 b\u00ebn bele tan purv\u00e0 y se prova mo for a arjonjer na majera autonomia, la reunificazion y la ndepend\u00ebnza cun la bones, ma danz z\u00ebnza suzes. Danz che nchinam\u00f2 ne n\u2019iesen nia stac boni de arjonjer chisc fins, no cun la ries, no cun la bones. N referendum ne ai mo nia pud\u00f9 f\u00e9, davia che l ie pruib\u00ec dal Stat. L ie da mui\u00eb che tla storia iel suv\u00ebnz un\u00ec arjont la autodeterminazion cun la viul\u00ebnza, nce sce l mess\u00ebssa vester mesun la arjonjer te na maniera pazifica.<\/p>\n

Autonomia tla Cumunit\u00e0 Autonoma Basca<\/h6>\n

Ul\u00ebsse mo j\u00ec ite sun la situazion giuridica dl Euskara tla Cumunit\u00e0 Autonoma Basca (BAC), donca nia te dut l Paesc Basch, ma m\u00e9 tla tr\u00ebi provinzies che toca pra la Cumunit\u00e0 Autonoma Basca: Bizkaia, Gipuzkoa y Araba. Ald\u00f2 dla costituzion spanuela dl 1978 y dl Statut de Autonomia dla Cumunit\u00e0 Autonoma Basca ie l basch y l spanuel doi rujenedes ufizieles y valives dal pont d\u2019ududa formel. Al zitadin ti v\u00ebniel garant\u00ec l d\u00ebrt de pud\u00ebi adurv\u00e9 uniuna dla doi rujenedes te na maniera liedia tl ciamp publich y tl privat.<\/p>\n

Ma danz che l ie mpo n\u2019assimetria danter la realt\u00e0 giuridica y soziolinguistica. N muessa sav\u00ebi da rujen\u00e9 spanuel, ma n ne muessa nia sav\u00ebi da rujen\u00e9 basch, n \u00e0 \u201cm\u00e9\u201d l d\u00ebrt de rujen\u00e9 l basch, ma nia n\u2019ublianza de l sav\u00ebi. Sceb\u00ebn che l ie na valivanza legislativa v\u00ebniel a s\u2019l d\u00e9 na defr\u00ebnza struturela.<\/p>\n

Mpar\u00e9 euskara y Korrika<\/h6>\n

L ie truepa lies y istituzions che pieta cursc per mpar\u00e9 euskara. Una dla majeres ie l AEK, l coordinam\u00ebnt de Euskardisazion y Alfabetisazion. Te si s\u00ebntes s\u00ebura dut l Paesc Basch possen f\u00e9 cursc cun l focus sun la comunicazion. Pra i cursc dl AEK v\u00ebniel nce fat juesc d\u2019uni sort per rujen\u00e9. Ch\u00ebsta lia m\u00ebt nce a j\u00ec enes de euskara, ulache n possa st\u00e9 n\u2019ena alalongia te na c\u00ebsa per rujen\u00e9 y viver l euskara. L ie enes defr\u00ebntes per mutons y mutans, j\u00ebuni y j\u00ebunes, j\u00ebnt plu de t\u00ebmp, families, j\u00ebnt che scum\u00ebncia a l mpar\u00e9 euskara, turis\u0107 y nsci inant.<\/p>\n

\"\"<\/p><\/blockquote>\n

Korrika ie na stafeta de saut\u00e9 s\u00ebura dut l Paesc Basch.2<\/a><\/sup>https:\/\/it.wikipedia.org\/wiki\/Korrika#\/media\/File:Korrika_2015,_Bilbo,_Euskal_Herria.jpg<\/span><\/small><\/em><\/p>\n

Per abin\u00e9 adum scioldi per finanzi\u00eb la r\u00eb de z\u00ebntri ulache l v\u00ebn fat cursc de euskara y per ntujiasm\u00e9 la j\u00ebnt de rujen\u00e9 basch \u00e0 l AEK met\u00f9 a j\u00ec la Korrika dal 1980 inant. L se trata de na stafeta de saut\u00e9 che v\u00ebn fata uni doi ani s\u00ebura dut l Paesc Basch. L v\u00ebn saut\u00e0 n\u2019ena alalongia dala pert franz\u00ebusa dl Paesc Basch nchin a Bilbo (per spanuel: Bilbao). Sce n uel f\u00e9 pea coche lia, scola, familia o grupa de cumpanies paien na c\u00ebrta soma. Cun chisc scioldi v\u00ebniel pona finanzi\u00e0 i cursc de basch. N pue\u2019 sciche pra la flama olimpica dan inant n testemone, ulache l ie laite na poejia o n test leterer. L autor o l\u2019autora de ch\u00ebsc test sauta pona l ultimo t\u00f2ch tl travert. Pona v\u00ebniel liet dant la poejia o l messaje.<\/p>\n

Li\u00e0 ala Korrika iel mo truepa d\u2019autra manifestazions, coche lauratueresc, de pitli cursc, prejentazions, referac, festes o auter. A Bilbo iel pona na gran gran festa per stl\u00f9 ju la Korrika.<\/p>\n

Serie<\/span> I<\/span><\/a> II<\/span> III<\/span><\/a> IV<\/span><\/a><\/p>\n