{"id":100650,"date":"2026-08-06T15:26:31","date_gmt":"2026-08-06T13:26:31","guid":{"rendered":"https:\/\/www.brennerbasisdemokratie.eu\/?p=100650"},"modified":"2026-08-06T15:28:07","modified_gmt":"2026-08-06T13:28:07","slug":"la-ikastola-tl-paesc-basch","status":"publish","type":"post","link":"https:\/\/www.brennerbasisdemokratie.eu\/?p=100650","title":{"rendered":"La Ikastola tl Paesc Basch."},"content":{"rendered":"
<\/div>

de Sofia Stuflesser<\/em><\/p>\n

\u201cIkasi\u201d uel d\u00ec \u201cmpar\u00e9\u201d per basch. La Ikastola ie na scola ulache n possa mpar\u00e9 basch. Truep genitores manda si mutons tla Ikastolak (l plurel fejen cun -ak), na scola ulache l v\u00ebn nseni\u00e0 dut per basch, ora che puecia \u00ebura de spanuel y ngl\u00ebisc al\u2019ena. A ch\u00ebsc ti dijen sistem imersif, sciche nce la scola tud\u00ebscia y taliana te S\u00fcdtirol. L travert dl sistem imersif ie ch\u00ebl de susten\u00ec la rujeneda basca, ajache l spanuel o franz\u00ebus mperen pa b\u00ebn feter da s\u00ebui tres i cuntac soziei y tres i media. Nfati ne \u00e0 la scul\u00e9es y i sculeies majera pert degun problem a studi\u00eb per spanuel o per franz\u00ebus do av\u00ebi fat na scola cun sistem imersif basch.<\/p>\n

\"\"<\/p><\/blockquote>\n

La Ikastola a Uztaritz.<\/em><\/small><\/p>\n

La prima Ikastola fova unida metuda su tl 1914, ma la majera pert de Ikastolak ie nasciudes danter l 1957 y l 1975 sota la ditatura de Franco, n pue\u2019 sciche la \u201cKatakombenschulen\u201d da n\u00ebus, cun l fin de nseni\u00eb basch. La Ikastolak ie dantaldut unides finanziedes tres mesuns privac y ie donca privates. Al didancuei v\u00ebn la Ikastolak tl Paesc Basc sustenides per l za. 90% da scioldi publics, tres la Cumunit\u00e0 Autonoma Basca. L rest v\u00ebn pai\u00e0 da genitores, nt\u00ebur a n 100 euro al m\u00ebns.<\/p>\n

\"\"<\/p><\/blockquote>\n

Na tlas tla Ikastola de Angelu.<\/em><\/small><\/p>\n

Ncueicund\u00ec iel 150 Ikastolak te dut l Paesc Basch, tla pert spanuela y franz\u00ebusa, ma plu da giut nen fovel mo scialdi depl\u00f9. Ti ani \u201990 \u00e0 truepa Ikastolak, dantaldut pitles, mess\u00f9 devent\u00e9 publiches pervia de na lege che ulova, ald\u00f2 dl pont d\u2019ududa de ch\u00ebi che l\u00ebura tla Ikastola, av\u00ebi plu sota cuntrol ch\u00ebl che la scoles fej. Ch\u00ebsta scoles publiches \u00e0 for mo inuem Ikastolak, sceb\u00ebn che les ne n\u2019ie nia plu de \u201cdr\u00eb\u201d Ikastolak. Te c\u00ebr luesc, p. ej. a Azpeitia, iel propi pervia de ch\u00ebsta lege doi Ikastolak, na privata y na publica. Ntan l Erasmus ei pud\u00f9 ti cial\u00e9 a tramedoi. N con\u2019 dla pedagogia ie tramedoi sortes de scola scialdi inuvatives, ma ie ove la mprescion che la Ikastolak privates \u00e0 mo na majera lid\u00ebza de speriment\u00e9 cun cunzec didatics plu inuvatifs.<\/p>\n

Ul\u00ebsse \u015b\u00ebn ve cunt\u00e9 dl\u2019esperienza che \u00e9 fat tla cater Ikastolak cun sistem imersif basch ulache son stata. Tr\u00ebi de ch\u00ebstes ie tla pert spanuela dl Paesc Basch: la Ikastola privata de Orio, la Urola Ikastola, che ie na scola publica a Azpeitia, y la Ikastola privata a Azpeitia. Tl Paesc Basch dl nord, donca tla pert franz\u00ebusa, sons stata tla Kimua Ikastola a Angelu, che ie daujin a Bayona. Te duta ch\u00ebsta Ikastolak ei pud\u00f9 usserv\u00e9 na maniera de nseniam\u00ebnt scialdi davierta y inuvativa dal pont d\u2019ududa didatich.<\/p>\n

Tla Ikastola de Orio iel duc i salam\u00ebnc b\u00ebndeb\u00f2 davierc. La scolina ie nce davierta per genitores. Nce \u00ebi possa un\u00ec ite y acumpani\u00eb i mutons y la mutans n struf, vivan pea per euskara. Per i genitores che ne rejona nia euskara ai tac\u00e0 su sun usc la paroles y frases plu mpurtantes per euskara. Te scolina y nce te scola v\u00ebniel laur\u00e0 te na maniera scialdi davierta, n pue\u2019 ald\u00f2 dl sistem Montessori. L ie truep lauratueresc, ulache i sculeies y la scul\u00e9es possa n pue\u2019 cr\u00ec ora cie che n fej dant o do, co che n fej a ruv\u00e9 al travert, cun chi o ulache n l\u00ebura. Tla tlasses plu autes ie l material didatich scialdi cunzentr\u00e0 sun proiec. Pra uni unit\u00e0 d\u00ebssel un\u00ec fat velch de pratich. I sculeies y la scul\u00e9es \u00e0 nce \u00ebures de lauratuere sun l prugram dl\u2019ena, trajan adum plu materies.<\/p>\n

Nteressant me savovel che l v\u00ebn nce fat mes\u2019 \u00ebura de meditazion al\u2019ena, metan ora madroc sutii te tlas. Uni tant giapa la scul\u00e9es y i sculeies plates de l\u00ebur da pens\u00e9 do n con\u2019 de s\u00e9 nst\u00ebsc, si emozions, si relazions cun d\u2019autri y truep depl\u00f9. Nscila v\u00ebniel promuet la sanit\u00e0 psichica.<\/p>\n

Scialdi bl\u00f2ta me savova nce la mascotte dla Ikastola, Argitxo, n pitl zberdl cun na lintierna. Ai mutons y ala mutans ti v\u00ebniel dit che la flama tla lintierna de Argitxo muessa for lun\u00e9. Sce n ne rejona nia plu euskara, pona se destuda la flama te si lintierna. La majera pert dla Ikastolak \u00e0 n pitl Argitxo de stof che conta, cianta, bala y nsci inant. Uni fin dl\u2019ena possa zachei d\u2019autri t\u00f2 pea Argitxo a c\u00ebsa y pona cunt\u00e9 n lunesc a scola cie che Argitxo \u00e0 fat y ud\u00f9. Regularm\u00ebnter fej Argitxo nce ndevins, ulache i sculeies y la scul\u00e9es possa pona mand\u00e9 ite si resposta. L ie nce mum\u00ebnc ulache Argitxo v\u00ebn coche persona v\u00ebira cun mascra te tlas a i cr\u00ec. Pona iel samb\u00ebn nce cianties y video d\u2019uni sort cun ch\u00ebsta mascotte.<\/p>\n

\"\"<\/p><\/blockquote>\n

La mascotte dla Ikastolak, Argitxo, cun si lintierna.1<\/a><\/sup>https:\/\/zubimusuikastola.eus\/es\/noticias\/2023-10-20-visita-de-argitxo<\/span><\/em><\/small><\/p>\n

Argitxo ne n\u2019ie nia li\u00e0 a na lij\u00ebnda, ma l ie un\u00ec nvent\u00e0 dala r\u00eb de Ikastolak, tlam\u00e0 Ikastola Elkartea, che fej nce dut l material didatich per euskara. I libri de scola per la Ikastolak v\u00ebn propi fac da j\u00ebnt basca, nia ciancei da libri spanuei. L ie mpurtant che i mutons y la mutans giape libri cun l pont d\u2019ududa basch, cis pra i libri de storia.<\/p>\n

Daujin ala Ikastola de Orio sons nce stata tla Urola Ikastola de Azpeitia, na scola urmei deventeda publica. Tlo ei dantaldut cial\u00e0 coche l v\u00ebn nseni\u00e0 l euskara. Azpeitia ie n stronghold, ch\u00ebl uel d\u00ec che l 70 % dla j\u00ebnt il\u00f3 rejona euskara. Te ch\u00ebsta bela scola v\u00ebniel fat n proiet pilot, EUSLE, acioche i imigranc giape na bona fundam\u00ebnta de euskara. Te d\u2019autra scoles ulache i fej ch\u00ebsc proiet pilot per imigranc \u00e0 chisc 3 \u00ebura de euskara al di, te ch\u00ebsta gor 5 al di: tr\u00ebi de euskara y doi de CLIL (content and language integrated learning), donca ulache biologia, storia, geografia y nsci inant v\u00ebn nseni\u00e0 per euskara. Daujin al nseniam\u00ebnt v\u00ebniel per chisc sculeies nce pit\u00e0 l proiet ICI per renfurz\u00e9 l euskara cun ativiteies domesd\u00ec ulache n mpera a cun\u00ebscer la tradizions basches, n va a nud\u00e9 y fej d\u2019autra ativiteies. Per la maestres de EUSLE v\u00ebniel pit\u00e0 furmazions aposta. Ch\u00ebsc proiet pilot costa samb\u00ebn truep scioldi, ma n v\u00ebija che l porta si fruc.<\/p>\n

Ie son pona nce stata te doi tlasses de EUSLE. I sculeies me savova bele do la rata boni de rujen\u00e9, nce sce i ne fova mo nia tan giut il\u00f3. Nt\u00ebur al 99% dl t\u00ebmp che fove il\u00f3 iel un\u00ec rujen\u00e0 euskara, mustran sun la cosses che n miena o les spiegan cun paroles plu sc\u00ebmples che n s\u00e0 bele.<\/p>\n

L moto dla Urola Ikastola me savova dr\u00ebt bel: na scola per duc cun l euskara al z\u00ebnter. Te ch\u00ebsta scola iel, sciche nce te d\u2019autra Ikastolak, na persona che se cruzia de promuever l euskara a scola, pitan lauratueresc, proiec y ativiteies d\u2019uni sort per sculeies y scul\u00e9es, nce tl t\u00ebmp liede. L v\u00ebn p. ej. fat l\u2019ena dl euskara y l di dl euskara, ulache n fej juesc, n cujina sp\u00ebisa tradiziunela, n mpera la cultura y la tradizions, n cianta per basch y nsci inant. Pra l Di dl Euskara v\u00ebniel part\u00ec ora prosces cun na ur\u00ebdla che n possa tach\u00e9 su sun l guant, sce n ie davierc y \u00e0 la pazienza de scut\u00e9 su persones che se st\u00ebnta a rujen\u00e9 euskara.<\/p>\n

Daujin al\u2019ena y al di dl euskara v\u00ebniel regularm\u00ebnter fat barac cun la scoles dl nord dl Paesc Basch. Dan se ancunt\u00e9 fisicam\u00ebnter scrijen e-mails o se manda videos per mpar\u00e9 a se cun\u00ebscer.<\/p>\n

Na scumenciadiva pra ch\u00ebla che duc i sculeies y l personal de scola fej for g\u00ebn pea, ie la Korrika, che ie na gran stafeta ulache l v\u00ebn saut\u00e0 n\u2019ena alalongia s\u00ebura dut l Paesc Basch. Dald\u00f2 ve conti mo depl\u00f9.<\/p>\n

Nteressant ie nce l program ULIBARI, ulache n se anconta cun autores, musicis\u0107 y j\u00ebnt cun l\u00ebures d\u2019uni sort. Nscila v\u00ebij i j\u00ebuni y la j\u00ebunes coche ch\u00ebsta persones viv l euskara te si mestier y tla vita da uni di.<\/p>\n

N auter proiet ie ch\u00ebl de se d\u00e9 ju y f\u00e9 eserzizies n cont de n film per euskara y pona l c\u00eblen.<\/p>\n

Nia m\u00e9 cun films, nce cun libri per euskara se dan ju. Te n proiet n cunlaurazion cun la biblioteca possi liejer libri stampei o digitei. I giapa cuestioneres y dumandes per nt\u00ebnder, ulache n giapa nce ponc. Pra ch\u00ebsc proiet possi se sent\u00ec sciche de tei nvestigad\u00ebures.<\/p>\n

Lijan libri giapa povester vel\u2019 un o vel\u2019 auter ueia de scr\u00ec nst\u00ebs. Tl Paesc Basch v\u00ebniel nce met\u00f9 a j\u00ec cuncorsc letereres per euskara, ulache l fej pea nce la Urola Ikastola.<\/p>\n

Ajache rujenon iust de scr\u00ec: per euskara iel l prugram de cumedures automatiches per tes\u0107 che \u00e0 inuem clarin.eu<\/p>\n

Samb\u00ebn ueghel che la ntelig\u00ebnza artifiziela ie bele scialdi inant per basch, ma de ch\u00ebl ve conti mo plu tert.<\/p>\n

La persona che se cruzia de promuever l euskara, ne l fej nia m\u00e9 per i stud\u00ebnc y la stud\u00ebntes, ma nce per l personal nseniant y per i genitores. L ie p. ej. un\u00ec fat n sfuei nfurmatif per personal nseniant nuef, ulache l v\u00ebn auz\u00e0 ora la mpurtanza dl euskara a scola. La sentedes de scola ie m\u00e9 per euskara, chi che ne nt\u00ebnd nia \u00e0 auriculeres cun la traduzion simultana fata cun la ngelig\u00ebnza artifiziela.<\/p>\n

Per i genitores che ne s\u00e0 nia euskara iel un\u00ec fat n sfuei nfurmatif, ulache l v\u00ebn sotriss\u00e0 la mpurtanza dl euskara a scola y spieg\u00e0 coche n possa acumpani\u00eb si mutons y mutans, p. ej. pra i duvieres, nce sce n ne nt\u00ebnd nia euskara. Sun la plata internet ON! v\u00ebijen mo videos n con\u2019 dla mpurtanza dl nseniam\u00ebnt basch, de coche n pud\u00ebssa acumpani\u00eb si mutons o mutans te ch\u00ebsc percurs y dla pusciblteies che n \u00e0 nst\u00ebsc de mpar\u00e9 euskara. La Urola Ikastola pieta nce cursc de basch per genitores.<\/p>\n

La comunicazion cun i genitores ie feter m\u00e9 per euskara. Al didancuei iel nce da n\u00ebus grupes Whatsapp di genitores. A Azpeitia feji ch\u00ebsta grupes cun Telegram, ajache ch\u00ebla app ie bona de cianc\u00e9 dal euskara. L problem ie m\u00e9 che la ne nt\u00ebnd nia l dialet euskara. Tla grupes chat di genitores v\u00ebn perch\u00ebl duc priei bel de scr\u00ec per euskara standard.<\/p>\n

La persona che se cruzia dl euskara te scola fej nce pea pra la Mesa de Euskara, n gremium ulache l ie representanc de tr\u00ebi z\u00ebntri educatifs, de lies sportives y d\u2019autra lies, firmes y nsci inant. N se anconta tr\u00ebi iedesc al ann per se f\u00e9 pensieres de coche n possa promuever l euskara mo depl\u00f9 tla vita da uni di. Te ch\u00ebsta Mesa de Euskara iel pona nce mo grupes de l\u00ebur, p. ej. familia-scola, hotelaria, lies sportives.<\/p>\n

N generel ei giap\u00e0 scialdi na bona mprescion dla Urola Ikastola a Azpeitia. L ie na scola scialdi inuvativa, davierta y inclusiva. Nteressant me savovel nce che sun la tofles dl\u2019aules y di ufizies iel nce scrit tla scritura per vierces.<\/p>\n

A scut\u00e9 su dut cie che l v\u00ebn fat per manten\u00ec y svilup\u00e9 inant la rujeneda euskara ei giap\u00e0 na gran ueia de s\u00eburant\u00f2 ch\u00ebsta ideies te nosta scoles ladines. L ne n\u2019ie pa nia na utopia, n mess\u00ebssa m\u00e9 se t\u00f2 dat n var al iede.<\/p>\n

Do vester stata tla Ikastola publica de Azpeitia sons mo jita tla Ikastola privata de Azpeitia. Il\u00f3 ne ei purtruep nia pud\u00f9 ud\u00ebi l nseniam\u00ebnt, ma l me savova nteressant ud\u00ebi n tel placat cun fotos de mutons y mutans da oradec\u00e0, che va \u015b\u00ebn te ch\u00ebsta scola. S\u00eburavia fovel scrit \u201cRejona euskara cun m\u00e9!\u201d, ajache suv\u00ebnz t\u00ebnten a rujen\u00e9 spanuel limpea. Nteressant fovel nce a ud\u00ebi duc i retlams dla universiteies per basch.<\/p>\n

La Ikastolak ne n\u2019ie nia m\u00e9 tla Spania, ma nce tla Franzia. Ie son stata tla Kimua Ikastola de Angelu danter Bayona y Biarritz. Il\u00f3 ei cial\u00e0 na lezion de euskara. Nce tlo fovel n nseniam\u00ebnt scialdi daviert: i sculeies pudova cr\u00ec ora sce i ulova sent\u00e9 sun n stuel, sun n pal\u00e9, sun n canap\u00e9 o sun n stuel plu aut, n pue\u2019 sciche te na bar. Sciche ove usserv\u00e0 te d\u2019autra Ikastolak v\u00ebniel scialdi fat lauratueresc cun de bel material didatich. Te ch\u00ebsta scola fovel truep mutons che rejona m\u00e9 franz\u00ebus a c\u00ebsa, ma si genitores i \u00e0 scric ite tlo, acioche i mpere nce euskara. I sculeies arjonj pa b\u00ebn mpo n bon livel de franz\u00ebus per j\u00ec a laur\u00e9 o studi\u00eb dald\u00f2, davia che te si nt\u00eburvia y te si vita da uni di ie la nflu\u00ebnza dl franz\u00ebus scialdi sterscia.<\/p>\n

Te duta la Ikastolak dl Paesc Basch ai l material didatich fat da Ikastola Elkartea. Coche bele nunzi\u00e0 inant feji scialdi material didatich bas\u00e0 sun proiec. Uni unit\u00e0 didatica ie n proiet. I ne fej nia dr\u00eb materiai didatics per chi che scum\u00ebncia, davia che la Ikastolak privates ie dantaldut pensedes per chi che rejona euskara a c\u00ebsa. Scialdi nteressanta me savova la unit\u00e0 didatica n cont dla soziolinguistica, ulache i sculeies y la scul\u00e9es d\u00ebssa pens\u00e9 do n cont dla dinamiches dla rujeneda, percie che i rejona p. ej. spanuel te c\u00ebrta situazions, mpede per euskara.<\/p>\n

Daujin al produz\u00ebnt de material didatich Ikastola Elkartea me ei nce mo ancunt\u00e0 cun IKAS, che fej materiai didatics per la pert franz\u00ebusa dl Paesc Basch, suv\u00ebnz nce n cunlaurazion cun l AEK, la lia che m\u00ebt nce a j\u00ec la Korrika. Daujin a chisc edit\u00ebures iel nce mo Elkar, che \u00e0 dantaldut fat libri per mpar\u00e9 autonomam\u00ebnter.<\/p>\n

\"\"<\/p><\/blockquote>\n

Material didatich fat da IKAS.<\/em><\/small><\/p>\n

Scialdi biei me savova nce duc i juesc de rujeneda che \u00e9 ud\u00f9 tla s\u00ebnta dl AEK a Bayona. Il\u00f3 assans n\u00ebus ladins mo truep da t\u00f2 do.<\/p>\n

Serie<\/span> I<\/span><\/a> II<\/span><\/a> III<\/span> IV<\/span><\/span><\/p>\n